बैतडी /बैतडीको पुर्चौडी नगरपालिका–७ स्थित बढ्गाउँ मोडमा जन्ती बोकेको बस दुर्घटनामा पर्दा आठ जनाको ज्यान गएको छ भने ४५ जना घाइते भएका छन्।
पुर्चौडी–७ कै भौनीबाट बेहुली लिएर बझाङको सुनकुडातर्फ फर्किँदै गरेको सुप प्र ०२–००१ ख १११९ नम्बरको बस बिहीबार साँझ दुर्घटनामा परेको जिल्ला प्रहरी कार्यालय बैतडीका डीएसपी दीपक कुमार रायले जानकारी दिए।
प्रहरीका अनुसार बस सडकबाट करिब दुई सय मिटर तल खसेको हो। दुर्घटनामा मृत्यु हुनेमध्ये बझाङका सात र बैतडीकी एक महिला रहेका छन्।
मृतकमा बझाङको बित्थडचिर गाउँपालिका–७ का ४० वर्षीय केशव राज जोशी, १३ वर्षीय अशोक राज जोशी, ३५ वर्षीय बसन्त जोशी, ४१ वर्षीय विष्णुदत्त जोशी र ४२ वर्षीय नरेश राज जोशी रहेका छन्। त्यसैगरी बझाङकै केदारस्युँ गाउँपालिकाका ६० वर्षीय मोहन देव भट्ट, जयपृथ्वी गाउँपालिका–७ का ४० वर्षीय बसन्त राज रतला तथा बैतडीको पुर्चौडी नगरपालिका–७ की पुष्पा अवस्थीको पनि मृत्यु भएको प्रहरीले जनाएको छ।
दुर्घटनामा घाइते भएका ४५ जनाको सुरक्षाकर्मी र स्थानीयवासीको सहयोगमा उद्धार गरी विभिन्न स्वास्थ्य संस्थामा उपचार भइरहेको छ। घाइतेमध्ये केहीको अवस्था गम्भीर रहेको बताइएको छ।
उकालो र मोड भएको सडक खण्डमा अत्यधिक भारका कारण बस अनियन्त्रित भई दुर्घटना भएको हुन सक्ने प्रहरीको प्रारम्भिक अनुमान छ। घटनाको विस्तृत अनुसन्धान भइरहेको प्रहरीले जनाएको छ।
